F.6 DSE 英文求生指南-由0追起上 Level 4+

升到上中六,你需要功利少少去睇下究竟將你每一分每一秒投資去邊。如果想由 0 開始急起直追,追到坐 4 望 5+,你需要好好善用每一刻。今次我為大家整合咗幾位英文高手嘅睇法,我再另外補充咗少少我嘅理解及意見,希望幫到大家。

Paper 1: Reading (佔分 20%)

我都好同意 2018 DSE 狀元 Monica 所講,Reading 建議多操多練,除咗 DSE 值得操,A-Level Past Paper Summary Cloze (aka fill-in-the blanks) 都可以幫你訓練語感(但不宜操太多,難度同DSE差距太大),CE reading 都值得用黎訓練基礎理解能力同考評局D套路,畢竟無人比考評局更了解考評局。

正如 jv_academy_jv 所講,呢一份卷性價比唔低,雖然客觀上嘅分數佔比的確唔算太吸引,只有20%,但事實上,閱讀理解係最容易自己進行操練嘅一份卷

你可以細心諗下,Paper 2 寫完篇文之後要搵老師改,又要等一段時間先有結果同評語;Paper 3又要播光碟,然後寫個篇Integrated tasks自己淨係可以對係咪搵齊晒points,其他嘢都係老師先可以比到實質評語;而 Paper 4更加係要約齊同學同老師先可以一齊練。

反觀Paper 1,自己就咁計時90分鐘就可以開始做,然後答案其實大多都絕對客觀,可以做完自己即刻改,而且中 marking 就係中 marking,唔中就係唔中。

每次幫自己對卷嘅時候細心研究自己點解會錯、多數錯喺邊度,記錄低晒,基本上Reading Comprehension 好快已經漸入佳境。總括而言,Paper 1佔分的確比其他分卷低,雖然仍有時間投資價值,但就不算太高,中六同學不值得投放大量時間於此卷,建議每星期完成 1-2 set comprehension (Part A + B) 已經足夠。

Paper 2: Writing (佔分 25%)

Writing 建議集中操練論說文(descriptive writing 出現機會極微,知道一 D descriptive writing 嘅技巧同字眼就可以了,short story更加好少直出),加上考試 Part B 你可以唔揀 descriptive writing 嘅題目 。

操練意思係搵下一 D 經常都可以用到嘅 sentence structures,例如你舉例子嘅時候就用Speaking of (sth) / XXX (e.g.) may spring to mind / Recent studies conducted by XXX (an organisation) has unmasked the fact that SVO / Say XXX and YYY, they are striking illustrations of (sth)。

另外要從自己嘅文搵出一D經常用到嘅字眼,然後再搵佢嘅同義詞,去豐富你嘅詞庫,避免係同一篇文反覆用同一個字,同時show off 比 marker 睇你嘅詞彙嘅多樣性。例如 in Hong Kong,你可以話 In the territory / in the city of splendour and luxury / in the hustle-and-bustle city of Hong Kong,盡量將平時最經常出現嘅詞彙 upgrade 成更加 advanced 嘅詞彙,咁就更加容易學以致用,用最小嘅成本換取最大嘅成果。

另外想進步得快D都可以搵D關於常見topic (e.g. spoon-feeding education/rote learning / stress / teenage issues / technological advancement / globalisation) 嘅文然後背左D經常可以用到嘅字句。

再老實d講,寫作呢份卷唔值得同學投資咁多,要改善寫作能力永遠不可能是一朝一夕的事,唯有踏實從根基開始推進,先至可以慢慢見到進步,並不是其他人所說的「背下句子就考好啊」。

更重要嘅係,好多同學以為自己chur緊呢份卷嘅時候,其實根本冇進步過。

近幾年好多同學尤其係上到中六嘅時候會成日背一啲句子、段落、推論、靚字或者文章,然後喺考試嘅時候key落去。

學習一啲靚嘅vocab唔係冇用,但係好多同學會強行用呢啲字,用得不適當,其實最後帶來反效果,完全損失時間成本。好多同學背左一啲段落同埋句子然後夾硬喺考試嘅時候貼上去,係極危險嘅動作,因為只要題目改變左少少,你所背嘅嘢都已經完全唔識用,好多同學曾經因為呢種動作而導致自己離題,係公開考試中最嚴重的犯錯。

如果你真係已經升到中六,你要以平常心面對呢份卷,我建議一星期寫至少一篇文,間中開個SCMP睇吓文章,因為考評局係想你用journalist style去寫文章,但Paper 2我不建議你投資最多時間,因為客觀地衡量是不值得。

Paper 3: Listening & Integrated Skills (30%)

眾所周知,佔分最重嘅一份卷就係Paper3。但係其實點解啲一份卷會佔最重分呢?你只要細心諗下,就會發覺其實呢一份卷係考晒你聽、說、讀、寫嘅能力,所以點解要做聆聽及綜合能力,就係因為佢真係測試到你嘅綜合能力嘅,所以亦都係點解佢係最重要嘅一份卷。

要喺好多地方執分極其容易,多加練習可以穩陣地攞到lvl5或更高嘅成績。呢份卷嘅投資價值係最高,亦都係中六同學想升grade嘅關鍵分卷,建議你有時間就練習,係重點操練嘅一份卷。

Part A 黎講都無咩特別,主要就係訓練聽英文嘅能力同抄寫速度。另外亦都可以練習速記,例如用 「Ss」 取替 「students」,節省mark答案嘅時間,準確記低每個答案,再稍後整理。

其實 Paper 3 Part B 最重要都係time住做,做多D。我自己係會將每個文體(formal or informal email / letter of complaint / feature article / advice page)分類,然後歸納出每個文體嘅 common introduction / ending paragraph同常用字眼,咁樣至少一拎到分卷已經知道要做D咩,節省思考開頭同結尾嘅時間。另外透過操卷你會發現考評局D套路,用 data file 都會更加熟練,組織篇文同語境意識都更加準確。

Paper 4: Speaking (10%)

Speaking 就同作文大同小異,最重要係練習組織/技巧同流暢度,詞彙既複雜性就係錦上添花。最緊要係要有清晰嘅回應同transition,然後就係自己嘅 topic sentence仲有elaboration,知道點樣取悅marker自然唔難高分。

跟呢份卷本身比重唔算好高,但呢份係極少數可以短時間內極速升grade嘅一份卷,因為其實考呢份卷唔需要你本身英文好好或者講英文講得好流利,只要你演技夠好,同埋做足晒人哋想見到嘅嘢 (eye contact, interaction, politeness, smile, etc.),基本上要攞lvl5都係一定冇問題。

只要你交足戲,樣樣做齊晒,呢份卷係可以幫你拉高英文科嘅總分,就算唔係拉高,都至少唔係成為你係英文科嘅拖累。建議每星期至少參與一次oral practice,就算冇機會年都要對住塊鏡講英文,唔順講到順,講到好自然,隨時準備好用英文對答,爭取機會講英文。

參考文章內容: