DSE 暑假溫書技巧分享

1. 點解暑假要溫書?

唔好以為暑假有好多時間。暑假你每日溫書嘅話你就比冇溫書嘅人溫多咗50日。唔好睇小呢50日,因為兩個暑假加埋就係100日,你考得好過其他人就係因為呢一百日你考得好過其他人就係因為呢100日。積少成多。

2.應該點樣去溫?

至於溫書方面,我建議分為兩類型嘅科目:(a) 語文通識科和 (b) 其他科目。咁究竟點解要咁分呢?

(a) 語文通識科

我認為語文通識科,即係中國語文科、英國語文科同埋通識教育科呢三科需要每一日慢慢浸淫從而提升水平(雖然呢三科係有少少 exam skills 學,但無底有 skills 都冇用),需要日積月累去建立根基,唔係話你做多一份 past paper 就突然之間有好大進步。

(b) 數學科和選修科

而其他科目 — 數學科和選修科 — 可以透過操練歷屆試題去學唔同嘅課題,而且更加可以令自己知道每一科每一個課題嗰個重點考核嘅內容係咩地方。而且考評局好鍾意翻炒歷屆試題嘅題目,你會發覺每個課題出卷出嚟出去好多時候都係問果幾樣野。無論係中四定係中五,我都不斷強調一定一定要做 past paper。

3. 但問題係:「究竟應該點樣分配時間呢?」

(a) 如果你今年升中五…

升中五嘅你,你呢個暑假嘅目標係鞏固返過往一年學過嘅課題。因為由中五開始,所有嘢就教得越嚟越快,先唔好講跟唔跟得切中五學嘅嘢,你一定冇乜時間溫返中四嘅嘢。而且中五學嘅嘢好多都係 base on 翻你中四學嘅嘢,所以你一定要溫故知新,將中四學過嘅嘢全部至少溫一次,而且一定要將中四學過嘅 topic 嘅 past paper 做一次。

(a) 如果你今年升中六…

而升中六嘅你呢一個暑假就要辛苦少少溫熟晒中四五所學過嘅所有課題,操曬所有 by topic past paper,至少一次。因為中六開始你又要去學新野,溫習返之前嘅嘢嘅時間比較少。

4. 溫書策略

究竟暑假應該點樣分配時間去溫書呢?

首先,第一樣野係你要認清楚自己嘅目標— 想入嘅大學科目,以及其收生要求。

你要知道自己需要喺每一科究竟想考到咩成績。

譬如一啲理科或者工程嘅大學科目咁,大學 Jupas 計分嗰時會將數學或者一啲 Science Subject (Phy / Chem / Bio / M2 / M1) 嘅比重提高啲,可能會額外 ×1.5 倍或者 2倍 ,咁你就應該花多啲心機同埋功夫落呢一啲有加乘嘅科目。

如果你想入理科或者工程,你喺數學科考 5* 同你喺中文科考 5*,顯然係前者着數啲同埋更加可以提高你入想就讀嘅大學科目嘅成功率。

而有啲同學想讀嗰科收生要求係最佳五科成績,咁你就會想擺多啲時間落你比較有信心嗰五科(畢竟每一個人嘅時間有限)。 所以,一定要知道自己嘅目標喺邊先。

所以,一定要知道自己嘅目標喺邊先。

當你知道自己目標係邊個陣,你就要準備相關嘅計劃同埋相應嘅行動並要付諸實行。

5. 個人經歷分享:溫書策略

就用返我以前讀中學嘅時候做例子。以前我讀中文、英文、數學、M2、通識、Physics 、Chem、BAFS。根據我啱啱嘅講法,你應該先將自己讀嘅科目分為兩類:

(1) 中文、英文、通識
(2) Math、M2、Phy、Chem、BAFS

(a) 暑假溫書時間:8-9 小時

每日我嘅溫書時間係大約8至9小時,每一日我只係溫3個科目,每一科每一次溫2.5-3小時。

我唔建議大家一日溫太多科,因為溫書係需要專注,如果一日溫好多科,每一科溫得一個鐘頭多啲,有機會連一個topic 都未溫曬。

至於每日應該溫邊3科?每一日我建議大家溫 1 個 (1) 嘅科目和 2個 (2) 嘅科目,每科 2.5 – 3 小時。

(b) 制定仔細的時間表

我建議你制定整個暑假嘅時間表你要知道你每一日每一個鐘每分鐘每秒用咗係咩地方,你要識講你自己嘅時間,呢一個係成功嘅第一步等。

而每一次溫書第一樣要做嘅嘢就係要先訂立嗰一日溫嗰一科嘅目標。你要知道自己嘅目標先知道要溫幾多、溫到邊、要溫到咩程度。

(c) 溫書先定操 past paper 先?

先講 (2) 呢類嘅科目先,如果你真係咩都唔識嘅話咁其實即刻做past paper係效用不大,因為連個根基嘅知識都未有。如果你自問係呢一個情況嘅話每一次溫書嗰陣先花大約1-2小時睇返筆記或者課本先,然後先再操練試題。

但假設你本身已經有少少底嘅話就可以快睇一次嗰一個課題嘅筆記就直接落做past paper。整體而言,我建議由會考 CE 2000年開始做起,做到大約2016年左右。2017、2018、2019 呢三年我會留返之後先做。

(d) 點都要印一 set by topic 嘅 past paper

記住點都要印一 set by topic 嘅 past paper。你可以去一啲坊間嘅論壇慢慢搵,又或者有啲學校嘅老師會俾埋你。如果你要自己印嘅話,記住呢筆錢唔慳得,因為呢一set野會跟你三年。呢個係好 investment,與其不斷去大型補習社補習,倒不如花少少錢投資落印 by topic pastpaper 到。

(e) 操卷方法

做卷嘅時候記住係 by topic 咁做,每一條都要當自己考DSE 咁認真咁做。睇完條題目唔識嘅話要迫自己用個腦諗下,俾啲掙扎,如果真係掙扎完都唔識嘅話,咁下一步先睇返書學唔識嘅嘢,然後嘗試作答。

最後答唔答得啱呢個唔係重點,重要嘅係你一定要睇返 Marking Scheme,學返識唔識嘅嘢,同埋諗多少少點解嗰個係考評局比嘅答案。當你做10年20年嘅卷,你就會開始搵到一啲 pattern,甚至你可以開始整少少筆記去記錄低一啲作答嘅技巧。

每一科每一次我建議溫一至兩個 topic,切忌心急。記住貴精不貴多。一個星期每科溫兩至三個 topic,一個暑假就好快溫得曬。

(f) 善用暑假就係一個拋離其他人嘅機會

中四個暑假溫好中四嘅課題,基本上中五個暑假你唔需要花太多時間去重新溫過,因為你已經有一個較深刻印象。人嘅記憶就好似一舊海綿咁,越印得深,越會記得。所以而家讀緊中四嘅你,唔好浪費呢個暑假。

而讀緊中五嘅你,如果你之前浪費咗上個暑假,呢一刻呢一個暑假要急起直追。

(g) 語文通識科:打好個底

跟住落嚟就講講 (1) 呢類科目。語文科雖然都有 skills 學,但唔可以忽略本身嘅語文底子同埋語感。

就用打仗做例子,你學到嘅時 skills 係你嘅裝備同埋武器,但如果你冇一個強壯嘅身體你都係好快會輸。平時話自己冇時間學語文嘅你,呢個暑假冇任何藉口,你要慢慢嘗試培養自己接觸語文一個習慣。

千祈唔好迫自己睇一啲自己冇興趣嘅嘢,所以我成日強調學英文唔一定要睇書。而家科技發達,你可以上網睇到好多唔同嘅文章,又或者一啲嘅電影同埋影片,其實睇 Netflix 都係一個學英文嘅方法。每一日花2至3小時比自己浸淫係一個語言裏面。

6. 總結

積少成多。暑假你每日溫書嘅話你就比冇溫書嘅人溫多咗50日。唔好睇小呢50日,因為兩個暑假加埋就係100日。當然,有部分同學可以一年半時間衝成個DSE,但係唔係個個同學都做得到。

天道酬勤。你唔需要暑假日日溫書,但係暑假你點都要分配部分時間落溫書到。B Chui 會繼續分享各科考試心得,陪大家考好DSE。一齊努力。

7. 由今日開始作出改變。

BChui 希望可以同你 keep 住聯絡,陪你考好 HKDSE 。所以我希望你可以做以下 2 樣野

  • Follow 我嘅 Instagram @bchuihkdse,我會分享好多考好DSE嘅讀書資訊!
  • Click 呢度 留d少少關於你嘅學習問題,我會定期分享唔同類型嘅 DSE 免費資源同讀書 Tips 畀你。或者click 下面呢個制都可以:)

8. 其他學習文章